Curves-ის გარდა არსებობს კიდევ უამრავი კომპანია, რომლებმაც ლურჯი ოკეანის შექმნის პროცესში სტრატეგიულ ჯგუფებზე გაამახვილეს ყურადღება. მაგალითად, Ralph Lauren-მა შექმნა “უმოდო მაღალი მოდის” ლურჯი ოკეანე. ეს კომპანია გამოირჩევა ყველაფრით, რასაც მომხმარებელი აფასებს მაღალ მოდაში - დიზაინერის სახელით, მაღაზიების ელეგანტური გაფორმებითა და დახვეწილი მასალებით. ამავდროულად, მისი განახლებული კლასიკური იმიჯი და ფასები მოიცავს ყველაფერ საუკეთესოს, რაც კი შეიძლება შემოგვთავაზოს ისეთმა კლასიკურმა ხაზებმა, როგორიცაა, ვთქვათ, Brook Brothers-ი და Burberry. ორივე ჯგუფის განსაკუთრებით მიმზიდველი ფაქტორების გაერთიანებით და დანარჩენი ფაქტორების გაუქმებით ან შემცირებით, კომპანია Polo Ralph Lauren-მა არათუ წილი მოიპოვა ორივე სეგმენტში, არამედ უამრავი ახალი კლიენტიც მოიზიდა ბაზარზე.

კომპანია Toyota-ს მიერ შექმნილმა მოდელმა Lexus-მა ძვირად ღირებული ავტომობილების ბაზარზე შექმნა ლურჯი ოკეანე, როცა Mercedes-ის, BMW-სა და Jaguar-ის ხარისხი ამავე ჯგუფის უფრო იაფფასიანი Cadillac-ისა და Lincoln-ის ფასად შესთავაზა მომხმარებელს.

მიჩიგანურმა კომპანია Champion Enterprises-მა ანალოგიური შესაძლებლობა დაინახა სამშენებლო დარგის ორ სტრატეგიულ ჯგუფზე _ წინასწარ დამზადებული სახლების მშენებლებსა და შეკვეთით მშენებლებზე დაკვირვებით. ტიპური მზა სახლები იაფი ჯდება და ადვილი ასაშენებელია, მაგრამ ერთფეროვნებით გამოირჩევა და დაბალხარისხიანი საცხოვრებლის რეპუტაციით სარგებლობს. შეკვეთის მიხედვით მშენებლები კი მრავალფეროვან ვარიანტებს სთავაზობენ მომხმარებელს და უფრო ხარისხიანადაც აშენებენ, მაგრამ ასეთი სახლების აშენება ბევრად უფრო ძვირი ჯდება და მეტ დროსაც მოითხოვს.

Champion Enterprises-მა ლურჯი ოკეანე ორივე სტრატეგიული ჯგუფის ძირითადი უპირატესობების შეთავაზებით შექმნა. ამ კომპანიის წინასწარ დამზადებული სახლები სწრაფად იწყობოდა და ბევრს იგებდა მასშტაბის ეკონომიისა და დაბალი დანახარჯების წყალობით. მაგრამ ამასთან ერთად Champion Enterprises-ი დამკვეთებს აძლევდა ისეთი “შტრიხების” შერჩევის საშუალებასაც, როგორიცაა ბუხარი, მანსარდის ფანჯრები და თაღოვანი ჭერებიც კი და რომლებიც შენობას თვითმყოფადობას სძენდა. ფაქტობრივად, ჩჰამპიონ-მა ძირეულად შეცვალა ტერმინ “ასაწყობი სახლის” მნიშვნელობა. შედეგად, უამრავი დაბალ- და საშუალოშემოსავლიანი კლიენტი დაინტერესდა წინასწარ დამზადებული სახლების ყიდვით - ნაცვლად იმისა, რომ ექირავათ ბაზრის საზღვრების რეკონსტრუქცია ან ეყიდათ ბინა. მეტიც, ამ ბაზარზე ბევრმა შეძლებულმა მყიდველმაც გადმოინაცვლა. თუმცა 2008 წლის მსოფლიო კრიზისმა ფასი დაუკარგა ლურჯი ოკეანის ამ სტრატეგიულ სვლას და მძიმე დარტყმა მიაყენა ჩჰამპიონ-ს - ისევე როგორც ამერიკის მთელ სამშენებლო ინდუსტრიას.

რა სტრატეგიული ჯგუფები არსებობს თქვენს დარგში? რატომ ირჩევენ კლიენტები უფრო მაღალი, ან უფრო დაბალი დონის ჯგუფებს?

ლურჯი ოკეანის სტრატეგია - ჩან კიმი; რენე მობორნი